ಭಟ್ಕಳ ತಾಲೂಕಿನ ಅಳ್ವೆಕೋಡಿ ತೀರದಲ್ಲಿ ನಿನ್ನೆ ಸಂಭವಿಸಿದ ದೋಣಿ ಅಪಘಾತದಲ್ಲಿ ನಾಪತ್ತೆಯಾಗಿದ್ದ ಒಬ್ಬ ಮೀನುಗಾರನ ಶವ ಇಂದು ಪತ್ತೆಯಾಗಿದೆ.
ಮಧ್ಯಾಹ್ನ ಹೊನ್ನೆಗದ್ದೆ ಕಡಲತೀರದಲ್ಲಿ ಮೃತದೇಹ ತೇಲಿಬಂದಿದ್ದು, ಸ್ಥಳೀಯ ಮೀನುಗಾರರು ಶವವನ್ನು ಮೇಲಕ್ಕೆ ಎತ್ತಿದ್ದಾರೆ. ಮೃತ ವ್ಯಕ್ತಿಯು ಜಾಲಿಯ ರಾಮಕೃಷ್ಣ ಮೊಗೇರ ಎನ್ನಲಾಗಿದೆ.
ಬೆಳಗ್ಗೆಯಿಂದಲೇ ಅಳ್ವೆಕೋಡಿ ಹಾಗೂ ಮುಂಡಳ್ಳಿ ತೀರದಲ್ಲಿ ನೂರಾರು ಚಿಕ್ಕ ದೋಣಿಗಳು ಮತ್ತು ನಾಡದೋಣಿಗಳು ನಾಪತ್ತೆಯಾದ ಮೀನುಗಾರರ ಶೋಧ ಕಾರ್ಯದಲ್ಲಿ ತೊಡಗಿವೆ. ದೋಣಿ ಮಗುಚಿದ ಸ್ಥಳದ ಆವರಣದಲ್ಲಿ ಶೋಧ ಮುಂದುವರಿದಿದೆ.
ಇನ್ನೂ ಮೂವರು ಮೀನುಗಾರರು ನಾಪತ್ತೆಯಾಗಿದ್ದಾರೆ — ಸತೀಶ ಮೊಗೇರ, ಗಣೇಶ ಮೊಗೇರ ಮತ್ತು ನಿಶ್ಚಿತ ಮೊಗೇರ. ಇವರಿಗಾಗಿ ಶೋಧ ಕಾರ್ಯಾಚರಣೆ ನಿರಂತರವಾಗಿ ನಡೆಯುತ್ತಿದೆ.
ಮೀನುಗಾರಿಕಾ ಸಚಿವರು ಸ್ಥಳಕ್ಕೆ ಭೇಟಿ ನೀಡಿ ಕಾರ್ಯಾಚರಣೆಯ ಪರಿಶೀಲನೆ ನಡೆಸಿದ್ದಾರೆ.
